மகளிர் தின நிகழ்வு – தழல்

தழல் இலக்கிய வட்டத்தின் முழுமதி தின இலக்கிய நிகழ்வாக “மகளிர் தின நிகழ்வு” எதிர்வரும் 16/3/2014 ஞாயிற்றுக்கிழமை காலை 10.00 மணிக்கு கலைஅருவி மண்டபத்தில் நடைபெறும்.

திருமதி.பெப்பி விக்டர் லெம்பர்ட் (தமிழ் -உதவிக் கல்விப் பணிப்பாளர், வலயக் கல்வி பணிமனை, மன்னார்) அவர்களின் தலைமையில் நடைபெறவுள்ள இந்நிகழ்வில் செல்வி.கோதை பரதலோஜினி, எழுத்தாளர் வெற்றிச்செல்வி, திருமதி.சுஜானா அப்துல் ரகுமான் ஆகியோரின் சிறப்புரையும், மாணவ மாணவிகளின் கவியரங்கம், கிராமிய நடனம், இசை ஆசிரியை செல்வி.ஜெயசீலியின் மாணவிகளின் வாய்ப்பாட்டு மற்றும் யாழ் பல்கலைக்கழக வருகை விரிவுரையாளர் ம.ந.கடம்பேஸ்வரனின் இலக்கண நூல் பற்றிய பார்வை ஆகியவை சிறப்பு நிகழ்வுகளாக இடம்பெற உள்ளன.

இந்நிகழ்வை எழுத்தாளர் வெற்றிச்செல்வியும், கவிஞர் சுஜானா அப்துல் ரகுமான் அவர்களும் நெறிப்படுத்துவார்கள்.

இந்நிகழ்விற்கான ஊடக அனுசரனையையும், மாணவர்களிற்கான பரிசுகளையும் வழங்கி உதவ www.newmannar.com திரு.மு.விஜிதன் அவர்கள் முன்வந்துள்ளார். அவரிற்கு தழல் குழுமத்தின் மனமார்ந்த நன்றிகள்

துளிர்விடும் துயரங்களும், நம்பிக்கைகளும்: வெற்றிச் செல்வியின் கவிதை நூல் வெளியீடு

Mannar (2)mவெற்றிச்செல்வி (செல்வி வேலு.சந்திரகலா) எழுதிய ‘துளிர்விடும் துயரங்களும் நம்பிக்கைகளும்’ கவிதைநூல் தைமாத முழுநிலா நாளாகிய நேற்று (15) மன்னார் ‘கலையருவி’ மண்டபத்தில் நடைபெற்றது.

மன்னார் எழுத்தாளர் பேரவையினரும் தழல் இலக்கிய வட்டத்தினரும் ஒழுங்குபடுத்திய இந்த நிகழ்வு, மன்னார் தமிழ்ச்சங்கத்தின் செயலாளர் துரையூரான் திரு.எம்.சிவானந்தன் அவர்களின் தலைமையில் நடைபெற்றது.

மங்கள விளக்கேற்றலுடன் ஆரம்பமான இந்நிகழ்வில் முதல் பிரதியை யாழ் பல்கலைக்கழக தமிழ்த்துறை பகுதிநேர விரிவுரையாளர் திரு.ம.ந.கடம்பேஸ்வரன் (காப்பியதாசன்) அவர்கள் வைபவரீதியாக வெளியிட்டு வைக்க, முதல் பிரதியைப் பாராளுமன்ற உறுப்பினர் சிவசக்தி ஆனந்தன் பெற்றுக் கொண்டார்.

மன்னார் எழுத்தாளர்கள் பலர் கலந்து கொண்ட இந்நிகழ்வில் துளிர்விடும் துயரங்களும் நம்பிக்கைகளும் கவிதைநூலின் மதிப்பீட்டுரையினை ஊடகவியலாளர் பொ.மாணிக்கவாசகம் நிகழ்த்தினார்.

Mannar (9)mஇதே நூலாசிரியரின் ‘போராளியின் காதலி’ நாவல் பற்றிய பார்வைப் பகிர்வினை நாவலாசிரியர் எஸ்.ஏ.உதயன், ‘ஈழப்போரின் இறுதிநாட்கள்’ நூல் பற்றிய உணர்வுப் பகிர்வினை சைபர்சிற்றி பதிப்பக உரிமையாளர் சதீஸ், ‘காணாமல்போனவனின் மனைவி’, ‘முடியாத ஏக்கங்கள்’ ஆகிய சிறுகதைத் தொகுதி நூல்கள் பற்றிய பார்வைப் பகிர்வினை எழுத்தாளர் கானவி, ‘இப்படிக்கு அக்கா’, ‘இப்படிக்கு தங்கை’ ஆகிய கவிதைத் தொகுதிகள் பற்றிய உணர்வுப்பகிர்வை கவிஞர் வேல் லவன் ஆகியோர் நிகழ்த்தினார்கள்.

ஏற்புரை மற்றும் நன்றியுரையினை நூல்களின் ஆசிரியர் செல்வி வெற்றிச்செல்வி நிகழ்த்தினார். இவர்களுடன் இந் நிகழ்வில் மன்னார் நகரசபை உறுப்பினர் து.குமரேசன், மன்னார் பிரதேசசபை உப தவிசாளர் சகாயம் ஆகியோரும் கலந்து கொண்டனர்.

மொழி என்பது ஒரு தேசிய இனத்தின் அடையாளம் – மட்டக்களப்பில் அருட்திரு. தமிழ் நேசன் அடிகளார்

மொழி என்பது வெறும் ஒலி மட்டும் அல்ல! மொழி என்பது வெறும் தகவல் தொடர்பு சாதனம் மட்டுமல்ல! மொழியைப்பற்றி பேசுகின்றபோது, “மொழி என்பது எண்ணங்களை எடுத்துச்செல்லும் ஊடகம்தானே” என்று சிலர் சாதாரணமாகச் சொல்லலாம். ஆனால் மொழியின் பரிமாணங்கள் பரந்துபட்டது. மொழி என்பது ஒரு தேசிய இனத்தின் அடையாளம்! மொழி இல்லையேல் ஒரு இனம் இல்லை. மொழி இல்லையேல் ஒரு இனத்தின் இலக்கியங்கள் இல்லை, கலைகள் இல்லை, பண்பாடு இல்லை, மரபுகள் இல்லை, சமயங்கள் இல்லை. ஒரு இனத்தின் இலக்கியங்களை, கலைகளை, பண்பாடுகளை, சமய நம்பிக்கைகளை தாங்கி நிற்பது மொழி.

இவ்வாறு கடந்த 8ஆம் 9ஆம் திகதிகள் மட்டக்களப்பில் நடைபெற்ற தமிழ்த்தூது தனிநாயகம் அடிகளார் நூற்றாண்டு விழா விழாவின் முதல் நாள் நிகழ்வில் கலந்து சிறப்புரையாற்றும்போது மன்னார் தமிழ்ச் சங்கத்தின் தலைவரும், மன்னார் மறைமாவட்ட கலையருவி இயக்குனருமான அருட்திரு. தமிழ் நேசன் அடிகளார் குறிப்பிட்டார்.

மட்டக்களப்பு தனிநாயகம் அடிகளார் நூற்றாண்டு விழாச் சபையின் ஏற்பாட்டில் மட்டக்களப்பு மகாஜனாக் கல்லூரியில் இடம்பெற்ற இந்நிகழ்வில் சிறப்புரையாற்றிய தமிழ் நேசன் அடிகளார் தொடர்ந்து பேசுகையில் கூறியதாவது,

உலக வரலாற்றுப் பக்கங்களைத் திருப்பிப்பார்த்தால் ஒரு உண்மை நமக்குத் தெளிவாகும். அதாவது ஒரு இனத்தை அழிக்கவேண்டும் என்றால் எதிரிகள் முதலில் அந்த இனத்தில் மொழியை அழித்திருக்கின்றார்கள். மொழி அழிந்தால் ஒரு இனம் தானாகவே அழிந்துவிடும்.

மொழி என்பது ஒரு தலைமுறை அடுத்த தலைமுறைக்கு தன் பண்பாட்டை எடுத்துச் செல்லும் வழி. தமிழர்களாகிய நம்மைப் பொறுத்தவரை தமிழ் மொழி என்பது வெறும் ‘வழி’ மட்டுமல்ல, அதுதான் நமது ‘விழி.’

ஏனென்றால் இரண்டாயிரம் ஆண்டுகால தமிழின் எழுச்சி, வீழ்ச்சி – தமிழின் வெளிச்சம், இருட்டு – தமிழின் மேடு, பள்ளம் இவற்றை உற்றுப்பார்த்தால் ஒரு உண்மை புலப்படும். அதாவது தமிழனின் மொழிக்கு ஊறு நேர்ந்தபோதெல்லாம் அவனது அரசியல், பொருளாதார, பண்பாட்டின் அடித்தளங்கள் ஆட்டம் கண்டிருப்பதைப் பார்க்கின்றோம்.

தமிழ்த்தூது தனிநாயகம் அடிகளார் தமிழுக்காகவே தன் வாழ்வை அர்ப்பணித்த ஓரு கத்தோலிக்க குரு. அவருடைய தமிழ்ப்பணிகள் ஈடுஇணையற்றவை. அவருடைய தமிழ்ப் பணிகளை மதிப்பீடு செய்த அறிஞர்கள் அவரைப் பற்றி கூறும் வார்த்தைகள் உண்மையில் நம்மை மெய்சிலிர்க்க வைக்கின்றன. “தமிழை உலக வரைபடத்தில் பொறித்தவர் தனிநாயகம் அடிகளார்.”“புலவர்களுக்குள்ளும் பண்டிதர்களுக்குள்ளும் முடங்கிக் கிடந்த தமிழை தனிநாயக அடிகளார் உலக அரங்கில் ஏற்றிவைத்தார்!

“இருபதாம் நூற்றாண்டில் இவரைப்போல் உலகளாவிய தமிழ்ப்பணி புரிந்தவர் வேறெவருமில்லை!” இந்த வார்த்தைகளை மேலோட்டமாகப் பார்த்தால் சிலவேளை மிகைப்படுத்தப்பட்ட வார்த்தைகளாகத் தெரியும். ஆனால் தனிநாயகம் அடிகளாரின் பரந்த தமிழ்ப்பணிகளை ஆழமாக நோக்கினால் இந்த வார்த்தைகள் உண்மையான வார்த்தைகள் என்பதை எவரும் இலகுவில் புரிந்துகொள்வர்.