இருத்தலை வெளிப்படுத்தல்

இருத்தலை வெளிப்படுத்தல்
====================== மன்னார் அமுதன்

ஒதுக்கிவிடும் பெருங்கூட்டத்தின் ஓரத்தில்
பல்லையும் தலையையும் நீட்டிக்கொண்டு
ஒளிப்படம் எடுப்பதில் தொடங்குகிறது
இருத்தலை வெளிப்படுத்தல்

நடிகரின் பக்கத்திலென்றால்
நான்காம் வரிசையானாலும் பறவாயில்லை
இடக்காதின் கடுக்கன் தெரிந்தால் போதும்
அடையாளத்தை நிரூபித்துவிடலாம்

சாதனையாளர்களின் கூட்டுப்படமொன்றில்
நிரப்பப்படாத நாற்காலியொன்றில்
ஓடிப்போய் அமர்ந்துகொண்டு
ஆள்மாறாட்டம் செய்யலாம்…
பின்னொரு தலைமுறையிடம்
சாதனையாளனாக அடையாளப்படுத்த எளிதாக இருக்கும்

பெருவிழாக்கள் என்றால்
சந்தன மாலையொன்றைக்
கையிலேயே கொண்டு செல்லலாம்
கூட்டத்திற்குள் மாலை மட்டும் தான் அடையாளம்
சிறப்புச் சிற்றுண்டி பெற்றுக்கொள்ள….

முட்டிக்கொண்டு படமெடுப்பது
முதலமைச்சருக்கும் பிடிக்காது தான்
தீட்டைப் போல் ஒதுங்கிநிற்பார்…
அதற்கென்ன செய்வது
அன்னியோன்யம் பேண முட்டத்தான் வேண்டும்

இருத்தலை வெளிப்படுத்தி
அடையாளத்தைக் காக்க
உலகை எதிர்த்து
இலக்கியம் படைக்கவா முடியும்

அவருக்கு வேண்டாமென்றால்
காறித்துப்பிக் கொண்டே
இருமுறை குளித்துவிட்டு போகட்டும்…

#மன்னார் அமுதன்

குறிப்பேட்டிலிருந்து…

குறிப்பேட்டிலிருந்து…
================== மன்னார் அமுதன்

எல்லாவற்றிற்கும் நாட்களுண்டு
அன்னையர் தினம், காதலர்தினம் போல
அழுவதற்கும் சிரிப்பதற்கும் கூட
தினங்களுக்கிடையில்
சிக்கிக் கிடக்கிறோம்

உறவினரின் மரணவீடொன்றில்
குமுறிக் குமுறிக் அழுதாலும்
கண்ணீர் வருவதில்லை
அது அழுவதற்குரிய நாளாயிருப்பதில்லை

நகைச்சுவையைக் கேட்டவுடன்
சிரிக்க முடிவதில்லை…
சிரிப்பதற்குரிய நாள்
மாதத்தின் இறுதிச் சனிக்கிழமை
சிரிப்புமன்றத்தில் குறிக்கப்பட்டிருக்கும்

காணாமல் போன சகோதரனைத் தேடவும்
காலம்போன கவிஞனுக்கு அஞ்சலி செய்யவும்
ஒருநாள் ஒதுக்கியிருக்கிறோம்…
உக்கிரமான கவிதைகளுக்கான நாளாகவும்
அவற்றைக் குறித்துக்கொள்ளலாம்

ஒதுக்கப்படாத நாட்களில்
எதிர்பாராமல் வந்துவிடும் நாட்கள் கூட
அன்றாடத்தைக் குலைத்துவிடுகிறது..
எரிச்சலை அள்ளி எல்லாவற்றின் மேலும் கொட்டுகிறது…

குறிப்பேட்டின் நாட்களெல்லாம்
நிகழ்ச்சிகளின் பின்னால் ஓடிக்கொண்டிருக்கின்றன
எல்லாவற்றுக்குமொரு நாளை நானும் குறித்துவைத்திருக்கிறேன்
எனக்கென்றொரு நாளையும்
உங்களில் யாராவது குறித்து வைத்திருக்கலாம்…

#மன்னார் அமுதன்

நாளை எல்லாமே கிடைத்துவிடலாம்…

நாளை எல்லாமே கிடைத்துவிடலாம்…
============================== மன்னார் அமுதன்

அவசரமாய் தேடிய போது தான் தெரிந்தது
வங்கிப்புத்தகம் தொலைந்திருந்தது
ஐந்து நிமிட தியானத்தில்
ஆற்றுப்படுத்திக்கொண்டு
அடுத்தகட்டமாய் வங்கிக்கு நகர்ந்தேன்

புதிதிற்கு விண்ணப்பித்தபோது
இன்னும் இருவாரம் ஆகுமென்றார்கள்
அதற்குள் மாலை வந்திருந்தது

மளிகைப் பொருட்களை வாங்கிக்குவித்து
வீடு திரும்புகையில் தெரிந்தது
வண்டிச்சாவி தொலைந்திருந்தது

தேடிக்களைத்து திரும்புகையில்
மாடு தின்றிருந்தது மளிகைப் பொருட்களை

இதுவரை தொலைத்த எல்லாவற்றையும்
நினைத்துக்கொண்டு வீடடைகையில்
தொலைத்ததைக் கண்டெடுத்த உற்சாகத்தோடு
கழுத்தைக் கட்டிக்கொள்கிறது குழந்தை

நாளை எல்லாமே கிடைத்துவிடலாம்…

======= மன்னார் அமுதன்